Ieu m’escondisc, domna, que mal no mier
de so que·us an de me dich lauzengier;
lo vostre cors fi, leial, vertadier,
umil e franc, cortes e plazentier
ab me, domna, per menzonjas comtar.
Al primier get perd’ieu mon esparvier,
que·l m’aucian el ponh falco lanier
e porten l’en, qu’ieu·l lor veia plumar,
s’ieu non am mais de vos lo consirier
que de nul’autra aver lo desirier
que·m do s’amor ni·m retenha al coljar.
Autr’escondich vos farai plus sobrier,
e no mi puosc orar plus d’encombrier:
s’ieu anc falhi ves vos neis del pensar,
quan serem sol en chambra e dintz vergier,
falha·m poders deves mon companhier
de tal guisa que no·m puosch’aiudar.
S’ieu per jogar m’asset pres del taulier,
ja no·i puoscha baratar un denier
ni ab «taula presa» no puoscha entrar,
anz get ades lo reir-azar derrier,
s’ieu autra domna deman ni enquier
mas vos, cui am e desir e tenh char.
Senher sia ieu de chastel parzonier,
et en la tor siam quatre parier,
e ja l’us l’autre no·ns poscham amar,
anz m’aian ops totz temps arbalestier,
metg’e sirven e gachas e portier,
s’ieu anc aic cor d’autra domna amar.
Ma domna·m lais per autre chavalier,
e puois, no sai a que, m’aia mestier;
e falha·m vens, quan serai sobre mar;
en cort de rei mi batan li portier;
et en cocha fassa·l fugir primier,
si no mentit cel que·us anet comtar.
Domma, s’ieu ai mon austor anedier
bel e mudat, be prenden e mainier,
que tot auzel puoscha apoderar,
cinch’e grua et aigro blanc e nier,
volrai lo donc mal mudat, galinier,
gort, debaten, que no puoscha volar?
Escut al col chavalc ieu ab tempier
e port sallat chapairo traversier
e renhas breus qu’om no puesch’alongar
et estreups loncs en chaval bas, trotier;
et a l’ostal truep irat l’ostalier,
si no·us menti qui·us o anet comtar.
Fals, enveios, fe-mendit lauzengier,
puois ab midons m’avetz mes destorbier,
be lauzera que·m laissassetz estar.