Στεφάνους μὲν κροτάφοισι
῾Ροδίνους συναρμόσαντες
Μεθύομεν ἁβρὰ γελῶντες·
῾Υπὸ βαρβίτῳ δὲ κούρη,
Κατακίσσοισι βρύοντας
Πλοκάμοις φέρουσα θύρσους,
Χλιδανόσφυρος χορεύει.
Αβροχαίτης δ᾽ ἅμα κοῦρος,
Στομάτων ἡδὺ πνεόντων,
Κατὰ πηκτίδων ἀθύρει
Προχέων λιγεῖαν ὀμφήν.
Ὁ δ᾽ ῎Ερως ὁ χρυσοχαίτης,
Μετὰ τοῦ καλοῦ Λυαίου
Μετὰ τῆς καλῆς Κυθήρης,
Τὸν ἐπήρατον γεραιοῖς
Κῶμον μέτεισι χαίρων.