Robert Burns (1759–96)

I hae a wife o’ my ain—

    I’ll partake wi’ naebody;

I’ll tak cuckold frae nane,

    I’ll gie cuckold to naebody.

I hae a penny to spend,

    There—thanks to naebody;

I hae naething to lend,

    I’ll borrow frae naebody.

I am naebody’s lord—

    I’ll be slave to naebody;

I hae a guid braid sword,

    I’ll tak dunts frae naebody.

I’ll be merry and free,

    I’ll be sad for naebody;

Naebody cares for me,

    I’ll care for naebody.