Þryms qvida
edr Hamarsheimt.
edr Hamarsheimt.
I.
Reidr var þá Vingþórr,
Er han vacnadi,
Ok síns hamars
Um sacnadi.
Scegg nam at hrista,
Scavr nam at dýia;
Reþ Jarþar burr
Um at þreifaz.
II.
Ok han þat orda
Allz fyrst vm qvaþ.
Heyrdv nv Loki!
Hvat ec nv mæli,
Er eigi veit
Jardar hvergi
Ne vpp himins.
Áss er stolinn hamri.
III.
Gengo þeir fagra
Freyio tvna.
Ok han þat orda
Allz fyrst vm qvaþ.
Mvntv mer Freýia
Fiaþr hams lia
Ef ec minn hamar
Mættac hitta.
IV. FREÝIA QVAÞ.
Þo mynda ek gefa þer
Þótt or gvlli veri.
Ok þó selia
At veri or silfri.
Flo þá Loki
Fiadrhamr dvndi,
Uns fyr vtan com
Ása garda,
Ok fyr innan com
Jötna heima.
V.
Þrymr sat a havgi
Þvrsa drottinn,
Greýiom sinom
Gvllbavnd snöri,
Ok mavrom sinom
Mavn jafnadi.
VI. ÞRYMR QVAÞ.
Hvat er med Ásom?
Hvat er med Álfom?
Hví ertv einn cominn
I Jötunheima?
(VII. LOKI QVAÞ).
Ilt er med Ásom,
Ilt er med Álfom.
Hefer þv Hlórida
Hamar vm fólginn?
VIII. (ÞRYMR QVAÞ.)
Ek hefi Hlórrida
Hamar vm folginn,
Átta rávstom
Fyr jörþ nedan;
Hann engi madr
Aptr vm heimtir
Nema færi mer
Freyio at qvæn.
IX.
Fló þá Loki,
Fiadrhamr dvndi,
Unz fyr vtan kom
Jötnaheima,
Ok fyr innan com
Asa garda.
Mætti han Þór
Midra garda,
Ok han þat orda
Allz fyrst vm qvad.
X.
Hefir þv erendi
Sem erfidi?
Segdv á lopti
Löng tiþindi.
Opt sitianda
Savgor vm fallaz;
Ok liggiandi
Lýgi vm bellir!
XI. LOKI QVAÞ!
Hefi ek erfidi
Ok örindi:
Þrymr hefir þinn hamar
Þvrsa drottinn.
Hann engi madr
Aptr vm heimtir,
Nema hanom föri
Freyio at qván.
XII.
Gánga þeir fagra
Freyio at hitta,
Ok han þat orda
Allz fyrst vm qvad.
Bittv þic Freýia
Brvdar líni.
Vid scolom aka tvau
I Jötunheima.
XIII.
Reid vard þá Freyia
Ok fnasadi;
Allr Ása salr
Undir bifdiz.
Stavcc þat iþ micla
Men brísinga.
Mic veiztv verþa
Vergiarnasta,
Ef ec ek meþ þer
I Jötunheima.
XIV.
Senn voro Æsir
Allir á þíngi,
Oc Ásynior
Allar á máli,
Oc of þat reþo
Ríkir tivar,
Hve þeir Hlóriþa
Hamar vm sætti.
XV.
Þá qvaþ þat Heimdallr
Hvítastr Ása;
Vissi han vel fram
Sem Vanir aþrir:
Bindo ver Þór þá
Brvþar líni.
Hafi han iþ micla
Men brísinga.
XVI.
Látom vnd hanom
Hrynia lvcla,
Oc kvenváþir
Um kne falla,
En á briósti
Breiþa steina,
Oc hagliga
Um havfvþ typpom.
XVII.
Þá qvaþ þat Þórr
Þrvdvgr Áss:
Mic mvno Æssir
Argan kalla,
Ef ec bindaz læt
Brvþar líni.
XVIII.
Þá qvaþ þat Loki
Laveýiar sonr:
Þegi þv Þórr
Þeirra orþa:
Þegar mvno iötnar
Ásgarþ bva,
Nema þv þinn hamar
Þer vm heimtir.
XIX.
Bvndo þeir Þór þá
Brvþar líni,
Oc eno micla
Meni brísinga,
Leto vnd hánom
Hrynia lvcla,
Oc kvenváþir
Um kne falla,
En á briósti
Breiþa steina,
Oc hagliga
Um havfoþ typto.
XX.
Þá qvaþ þat Loki
Laveýiar sonr:
Mvn ec ok meþ þer,
Ambót vera;
Viþ scvlom aka tvav
I Jötvnheima.
XXI.
Senn voro hafrar
Heim vm reknir,
Scyndir at scavclom
Scyldo vel renna.
Biörg brotnoþo,
Brann jörþ loga
Ok Oþins son
I Jötvnheima.
XXII.
Þá qvaþ þat Þrymr
Þvrsa drottinn:
Standit vpp Jötnar,
Oc stráiþ becci;
Nv færit mer
Freyio at qvan
Niarþar dóttr
Or Nóatvnom.
XXIII.
Gánga her at garþi
Gvll hyrndar kýr,
Öxn alsvartir
Jötni at gamni.
Fiölþ á ec meiþma
Fiölþ á ec menia.
Einnar mer Freio
Ávant þiccir.
XXIV.
Var þar at qveldi
Um comit snimma,
Ok fyr iötna
Avl fram borit.
Einn át oxa,
Átta laxa,
Krásir allar
Þær er konor scyldo,
Dracc Sifiar verr
Sáld þriv miaþar.
XXV.
Þá kvaþ þat Þrymr
Þvrsa drottinn
Hvar sáttv brvþir
Bíta hvassara?
Sáca ec brvþir
Bíta en breidara,
Ne inn meira miöþ
Meý vm drecka.
XXVI.
Sat in allsnotra
Ambot fvr,
Er orþ vm fann
Viþ iötvns máli.
Át vætr Freýia
Átta nóttom,
Sva var hon óþfús
I Jötvnheima.
XXVII.
Lavt vnd líno
Lysti at cyssa.
Enn han vtan stavcc
Endlángan sal.
Hví ero avndótt
Avgo Freýio?
Þicci mer or
Avgom brenna.
XXVIII.
Sat in allsnotra
Ambót fyri,
Er orþ vm fann
Viþ iötvns máli.
Svaf vætr Freýia
Átta nóttom,
Sva var hon ódfús
I Jötvnheima.
XXIX.
Inn com in arma
Jötna systir
Hin er brvþfiár
Biþia þorþi:
Látto þer af havndom
Hrínga ravþa,
Ef þv avþlaz vill
Ástir mínar,
Ástir mínar,
Alla hylli.
XXX.
Þá qvaþ þat Þrymr
Þvrsa drottinn
Beriþ inn hamar
Brvþi at vígia,
Leggit Miöllni
I meýiar kne,
Vigit ocr saman
Varar hendi.
XXXI.
Hló Hlórriþa
Hvgr í briósti,
Er harþhvgaþr
Hamar vm þecþi.
Þrym drap han fyrstan
Þvrsa drottinn,
Oc ætt iötvns
Alla lamdi.
XXXII.
Drap han ina avldno
Jötna systor,
Hin er brúþfiár
Of beþit hafþi,
Hon skell vm hlavt
Fvr skillínga,
En havgg hamars
Fvr hrínga fiöld.
Sva com Oþins sonr
Endr at hamri.