Anonyme, 15. Jahrhundert

Dat achte kapittel

Wo Reinke mit Brûn dem baren gink unde ên leidede, dar he honnich ęten scholde, dat em ovel bequam; wo en Reinke bedrôch unde leten stân beklemmet in dęme bome efte blocke mit dem hovede unde by den vôten.

Do de avent was gekomen,
un̄ Reinke dat hadde vornomen,
dat Rustevyl, de vorgesechte bûr,
to bedde was in synem schûr:
Rustevyl was van grôteme love
ên timmerman, un̄ hadde in synem hove
liggende ene eke, de he wolde kloven,
un̄ hadde dâr ingeslagen boven
twe grote kyle, de weren sêr glat.
Reinke de vos merkede dat.
dat sulve holt was an ener syt
upgeklovet ener ellen wyt.
he sprak: horet my, Brûn ôm,
recht hier in dessem sulven bôm
is honniges mêr wan gy lovet;
stęket darin wol depe juwe hovet,
nemet nicht to vele, dat is myn rât,
ju mochte dâr anders af komen quât
in juweme lyve, syt des bericht. —
Brûn sprak: Reinke, sorget nicht!
mene gy, dat ik sy unvrôt?
mate is to allen dingen gût. —
Alsus lêt sik de bare bedoren,
un̄ stak dat hovet in over de oren
un̄ ôk de vordersten vôte mêde.
Reinke do grote arbeit dede:
he brak ût de kyle mit der hast.
dâr lach de bare gevangen vast
mit hovet un̄ vôten in der eken,
em halp wedder schelden edder smeken;
he plach to węsen kone un̄ stark,
men hier hadde he syn vulle werk.
sus brachte de neve synen ôm
mit lôsheit gevangen in den bôm.
he begunde to hulen un̄ to brâschen,
mit den echtersten vôten to krâschen,
un̄ makede also groten lût,
dat Rustevyl mit der hast quam ût;
he dachte, wat dâr węsen mochte.
ja, ên scharp byl he mit sik brochte
up eventûr, efte des were nôt.
Brûn lach dâr in angeste grôt:
de klove, dâr he in lach, ene knêp,
he brak sik un̄ tôch, dat he pêp;
men dat was pyn umme nicht gedân,
he vormode sik nummer van dâr to gân.
dat mênde ôk Reinke, un̄ sach Rustevyle
van vêrne komen mit dęme byle;
he rêp to Brûnen: wo steit it nu?
ętet nicht to vele, dat rade ik ju,
des honniges! segget my, is it ôk gût?
ik se, dat Rustevyle kumt hęrût:
villichte wil he ju bedenken
un̄ wil ju up de mâltyt schenken. —
dârmede gink Reinke wedder na hûs,
na syneme slote to Malepertûs.